Іантар іе цѣнен всіуде не само както оздоба (украшеніе), но и както капсула времени, же храни слѣды дрѣвнаго живота ‐ од рѣдкых примѣров капек воды и пухырков воздуха до растлин, насѣкомых (шестиножек) и даже птиц.

Обычаіно іантар сѧ твори миліоны лѣт, докогда смола од древ сѧ преврати в скаменелості, але палеонтологы убыстриху сиі пробѣг, сотворившы подобіе іантара од борноі смолы само чрез 24 часа. Ова метода може разкрыти биохиміу твореніа іантара, же инако могло бы остати в глѫбинѣ дохисторичноі минулости.

Изходы експеримента сѫ выдани в часопису Scientific Reports. Ово убыстреніе іе можным соравнити с іѣдлом (іѣством), же іе приготовеным в быстроваркѣ, каже Еван Саіта, научник Филдовскаго музеіа в Чикаго и сотворец изисканіа.

Препис (рецепт) творнаго іантара сѧ почѧше од работы над смолоі из Чикагскаго ботаничнаго сада. Господин Саіта и сотворец Томас Кеі, независны пелонтолог, додаста дискы смолы в устроі, ктор г. Кеі створише од медичнаго преса дліа пилулек, пухырев стискнутаго воздуха и иных подрѫчных деталеі.

Грѣіѫчи и стискаіѫчи образцы, изискатели имитираху діагенез – мѣдлы физико‐химичны пробѣг, ктор сѧ дѣіе пред тым, како смола сѧ претвори в скаменелості.

«Діагенез іе послѣдноі преградоі, ктору трѣба іе преити абы стати скаменелостіу, — поіасніаіе г. Саіта, ‐ то іе както остатны дотык».

Не всѣ образцы сѫ идеалными, але нѣкторы повториху посебности природнаго іантара: темнулости, разщепы, одводненіе (лишеніе воды) и высочаішы блѣск.

В пробѣгу експеримента научницы поразумѣху, же од почѧтку избраху неправилны вид сосны. Палеонтологы чѧстше изучаіѫт іантар од смолы древ Sciadopitys, іединственым живым представником кторых нынѣ іе іапонска іелица (сосница) (Sciadopitys verticillata).

В бѫдѫчности г. Саіта планира додати в смолу насѣкомо, перо или растлину. То може быти корыстным, бо истински образцы сѫ веліми цѣнными и не могѫт быти изпытани разрушителноі методоі разбора. «Насѣкомо в творном іантару не бѫде имети цѣнности, бо оно іе створено в лабораторіи», — поіасніаіе он.

Научницы такоже хочѫт адаптирати методу дліа достаніа разложеніа органикы и имитираніа геологичнаго извѣтреніа – то бѫде помогти повторити различни етапы камененіа.

В настѫпности метода може помогти предповѣдити, како бѫдѫт изглѧдати скаменелости бѫдѫчности. Како бѫде изглѧдати скаменелості ткани и кости, имѣіѫчи микропластик или тѧжки ковины (металы)? Не можеме жити миліоны лѣт, абы то познати. Але корыстаіѫчи ову «быстроварку», мы можем сѧ приблизити до познаніа.