Далноглѧд Джеімс Уеб през три года працованіа іе представил множество уникалных даных о далных кѫтках Всіеміра. Ново изисканіе, же быше разслѣдовано научниками Изучилища штата Канзас Лиором Шамиром, изъіавише іедну од наі‐удивителных и таіенственых посебностіеі далнаго космоса ‐ вечина галактик сѧ обрачаіѫт в іедину страну. Работа быше выданоі в часопису MNRAS (Monthly Notices of the Royal Atronomical Society).

Разбор снимков далнаго космоса, же быху достани вѫтрѣ проіекта JADES (Advanced Deep Extragalactic Survey), показаше, же около двух третин галакти сѧ обрачаіѫт по стрѣлкѣ часовника, и само третина ‐ противу того. Научницы изучаху 263 галактикы од проіекта JADES, обраченіе кторых быше достаточно легко изъіавити.

«Разлика іе тако веліка, же ту можно позрѣти без специалнаго знаніа», — одповѣдише Шамир, — «Всіакы человѣк, же поглѧда на снимкы, може то узрѣти».

Днешна космологіа мысли, же броі галактик сѧ обрачаіѫщих по и противу стрѣлкы часовника муси быти равным. Іеднак даны далноглѧда Джеімс Уеб показа, же іествованіе преваженіа (доминираніа) страны обраченіа галактик даіе сомнѣніе в правилности нашеі представы о Всіемірѣ.

Шамир предложише двѣ можности объіасненіа. Първа хипотеза іе в тому, же Всіемір може быти роджен с наличностіу своіего обраченіа. То іе согласным с теоріеі «чърноі дири», ктора говори же Всіемір іе вѫтрешнеі чѧстіу чърноі дири. Ако то іе правилным, сѫчи космологични моделы могѫт быти неполными.

Втора хипотеза іе вѧзана с ефектом Доплера. Земліа сѧ обрачаіе около Млечнаго Пѫти, и с поводу того свѣт од галактик, же сѧ обрачаіѫт в обратному смѣру, може сѧ изъіавіати по‐іаркым. Ако ово поіасненіе бѫде правилным, научницы хте мусѧт преглѧдати своіи методы мѣреніа далности в космосу, что такоже може изъіаснити недослѣдності быстрости ширеніа Всіеміра и іествованіа велікых галактик, ктори сѧ кажѫт по‐старыми неж може дозволити сам Всіемір.