Сатурн има тѧжину 95 вече неж Земліа, але нѣколіко одстѫпа од тѧжины Іупитера, ктор има тѧжину 318 вече неж Земліа. Долго времѧ всѣ мыслиху, что іе логичным, же он има міеніш спѫтников неж Іупитер. Але ситуаціа сѧ смѣнише в 2020-х годах, когда улѣпшеніе далноглѧдов даше одповѣд на ову проблему: Сатурн има вече спѫтников.

Іещо в 2017 году шеста планета нашеі составы имаше само 50 лун (спѫтников). Але днесі мы знаме о 274 лунах Сатурна: то іе двакрат боліеі неж купно имаіѫт всѣ остатни планеты Сълнечноі составы.  Звѣздзнавцы, же створиху одкрытіе мыслѧт, же ово обиліе іе изслѣдком катастрофичнаго разрушеніа. Мусиме казати, же іеднак в 1995 дружина научников выдаше работу, ктора предповѣдише скупину спѫтников Сатурна с колобѣгом истым како имаіѫт днешни одкрыти спѫтницы, и ова предповѣді быше выдана без хипотез о катастрофах.

В 2023 году дружина звѣздознавцев проведоше додатни изглѧданіа хвала далноглѧду Canada France Hawaii и изъіавише разом 128 новых спѫтников. На сіеі седмицѣ (11 брезніа 2025 года) Меджународны звѣздозналны соіѫз официіно признаше сіи нови спѫтницы и додаше им номеры в трех документах (първы, вторы, трети), а в бѫдѫчности они хте достѫт имены од скандинавскоі, галскоі или инуитскоі митологіи. Вечина спѫтников донынѣ не имаіѫт полнаго описаніа колобѣга. Іе познано, же вечша чѧсті іе «скандинавскоі скупиноі», т.е. ретроградни спѫтницы. Мимоходом, ови ретроградни спѫтницы, их число (броі) у шестоі планеты, додаіѫт  многу особності ситуаціи. Ретроградни сѫ луны, кторы сѧ обрачаіѫт противу обраченіа самоі планеты: они не могѫт быти створены из творива планеты, але сѫ приішлыми извнѣ и присвоіеными планетоі‐господаром. Нормално, они сѫ веліми рѣдкыми, але Сатурн іе стал изкліученіем.

Спѫтницы быху изъіавіени посрѣдством метода «измѣщеніе и наложеніе»: звѣздознавцы створиху нѣколіко снимков іеднаго дѣла (чѧстка) неба, наложиху их іедин на другы, и имаху возможності познати блѣди объіекты. Всѣ 128 спѫтников сѫ «кривыми» — имѫт не кулну (окрѫглу) форму, але подобну до зѣміака (картофеліа), бо их пречник не превыси нѣколікых километров.

Имаіе предположеніе, же ови спѫтникы сѧ поіавиху од одломков вечшых объіектов, кторы быху разрушени од множества ударов и потычек в послѣдни 100 млн. годов. Творцы новоі научноі работы сѫ описали 64 од 128 новых спѫтников и достали даны, же 54 од описаных 64 сѫ «скандинавами», т.е. ретроградными. Размѣр и наклон их іе тако подобен, же научницы сѫ створили нову подскупину «Мундиліфари» (од скандинавскоі митологіи), по имени наі‐велікаго объіекта подскупины.

Они сѫ предположили, же ова подобності параметров подскупины не іе случаіным и десѧткы тѣл сѧ поіавили в послѣдствѣ іеднаго катастрофичнаго натыка в послѣдни 100 млн. лѣт назад. Але загадка іе в болішему простору меджу членами “Мундиліфари” (колобѣжному фазовому простору), неж можно очакати послѣ резултата подобнаго натыка (параметры подскупины тогда трѣбаіѫт быти днесі по‐подобными).

Такоже Naked Science писаше, же в 1995 году крымски изискатели Горкавы и Таідаков предповѣдаху бытіе ретроградных спѫтников Сатурна, кторы не быху одкрытыми тогда. Предповѣді быше створена од изчислениі: тѣлы, кторы долетѫт до составы Сатурна «против волны (сіерсти)» (ретроградно), неизбѣжно биху сѧ мѣдлили од соудареніа с чѧстицами іегова околопланетнаго диска, скоро утрачаіѫчи быстрості и сѧ остаіѫчи в іеговоі составѣ.

Планеты без толіко мочнаго диска не имѫт оваго сценаріа, бо астероиды хте пролетѫт мимо планеты без сниженіа быстрости. В то времѧ іе было познано само 17 простых спѫтников и іеден ретроградны, ктор сѧ мыслише както изкліученіе.

Фактом іе, же послѣ днешных одкрытиі, доставшых признаніе Меджународнаго звѣздозналнаго соіѫза, творцы чланка 1995 года предповѣдиху близко ста спѫтников Сатурна – то  іе наі‐веліка предповѣді в повѣсти (хисторіи) звѣздознаніе до днесі. В 2001 году Горкавы и Таідаков такоже предповѣдиху скупину спѫтников Нептуна на подлогѣ (закладѣ) изчислениі: днесі имаіеме одкрытых 5 спѫтников. Что бѫде напреди?