Структура-та има веліку стабилності.

Планетознавцы при помочи моделираніа сѫ изъіаснили, же вѫтрешна чѧсті обвлака Оорта на окраіинах Сълнечноі составы има долгосталу спиралну структуру со двома рѫковама. Іеднако прѣмы дозор іе дості трудноіѫ работоі.

Обвлако Оорта іе сбором ледных тѣл во внешноі чѧсти Сълнечноі составы, надалі од тысѧчи до ста тысѧч звѣздозналных мѣр (a.u. – далності Земли од Сълнца). Оно има своіе начѧло около 4,6 млрд. лѣт назад, такоже како и основна чѧсті Сълнечноі составы. Колобѣгы тѣл обвлака Оорта быху сотворени хвала планетным возбуреніам, Галактичному приливу и ближеніу Сълнца до иных звѣзд. Изисканіа овоі структуры сѫ веліми важными дліа планетознавцов, кторы имѫт предмѣт изученіа реконструкціу пробѣга (процеса) твореніа и формираніа Сълнечноі составы.

Внешна чѧсті обвлака Оорта (около десѧти тысѧч звѣздозналных мѣр (a.u.) од Сълнца) іе здроіем долгоперіодичных комет и предположно има кулну (сферичну) форму. Колобѣгы тѣл вѫтрешноі чѧсти обвлака Оорта имѫт вече влиіаніа Сълнца неж околных звѣзд. Доднесі ова чѧсті обвлака іе была мыслена близко как‐то плоскы диск, имаіѫчи близ равно положеніе односно еклиптикы.

Але дружина планетознавцов под начѧлом Давида Несворны из Iуго-западнаго изискателнаго изучилища помыслише подробно поразумети, како сѧ изглѧда вѫтрешна чѧсті обвлака Оорта односно удаленаго глѧдателіа. Абы то поразумети, они сотвориху моделираніе кретаніа колобѣгов велікаго числа (од нѣколікых дѣсѧтков до миліона тѣл) планетесималіеі (малых тѣл около протозвѣзды) согласно вливу гравитаціи внешных планет Сълнечноі составы при их миграціи кроз составу, вливу планет/планетнаго разсѣіаніа на планетесималны диску, а такоже вливу гравитациінаго потенціала Млечнаго Пѫти и проходжѫчих мимо звѣзд на планетесимални колобѣгы. Резултаты изисканіа и моделираніа соравніаху с обзорными даными неба DES транснептуновых объіектов за період 2013-20219 годов.

Сѧ оказало, же вѫтрешна чѧсті обвлака Оорта іе изкривіеным диском со спиралноі структуроі двох рѫкавов, имаіѫчи промѣр (діаметр) пѧтнадѣсѧт тысѧч звѣздозналных мѣр и разположеніе близ прѣмостоіно (перпендикуларно) односно Галактичнаго диска. Имаіе предположеніе, же ова спирална структура іе сѧ сотворена хвала първичному разсѣіаніу малых тѣл гравитаціеі планет с постѫпным повышеніем удаліености их перигеліев и обраченіа плоскости колобѣга хвала Галактичному приливу.