Хвала далноглѧду Джеімс Уеб научницы сѫ достали невѣроіѧтно подробны снимек зародженіа младоі звѣздноі составы НН30, ктора іе в 30 свѣтовых годах од Земли в созвѣздіи Быка. Ово одкрытіе хте попусти научникам лѣпіеі поразумити пробѣгы родженіа звѣзд и планетных состав. Снимек быше выдан на странице Еуропскаго космичнаго агентства (ESA). HH30 іе малоіѫ мъгловиноі, ктора іествуіе заради взаіемодѣіности мочныхпотоков іонизованаго плына новых звѣзд и околнаго меджузвѣзднаго творива.

Новы снимек далноглѧда Джеімс Уеб показа допланетны диск звѣзды, ктор іе окѫтан изкыдным плыном и пылом. Од средины диска сѧ изрыва ѫзкы многобыстры струіны изкыд (джет), ктор минуіе ширѧчіи сѧ потоцы плына и створіаіе лѣпы и рѣдкы вид. Хвала инфрачървеным (нижечървеным) мочностіам далноглѧда, звѣздознавцы сѫ достали крозі гѫсти слоіи пыла абы изучити наі‐малы подробности пробѣга родженіа звѣзды.

Дружина изъискателіеі соіединише дани далноглѧда Джеімс Уеб с даными далноглѧда Хабл и скупины радіоглѧдов ALMA. То сотворише можным изучити составу НН30 в различных обсѧгах електромагнитнаго спектра и изъіавити важни посебности родженіа планетарных состав.

Наприклад, научницы изъіавиху, же чѧстицы пыла в протопланетному диску дѣіствуіѫт различно зависно од их велічины: домилиметрови чѧстицы пыла іествуіѫт во всему объіему составы, а милиметрови чѧстицы ‐ само в дисковому слоіу составы. Овы пробѣг, мыслѧт научницы, іе кліучовым дліа бѫдѫчего родженіа планет: пыл бѫде сѧ склѣіати и държати сѧ заіедно, будуіѫчи (формируіѫчи) по‐веліки тѣлы – предходницы бѫдѫчих планет.

Такоже научницы сѫ познали, же быстроструіно свѣтло из НН30 има взаіемно дѣіство с околным творивом, творѧчи ударны (разовы) вал и грѣіѫчи плын до іегова свѣченіа в нижечървеному и видимому обсѧгу. Овы ефект помагаіе звѣздознавцам и даіе уникалну можності изучати физику овых іавіені (феноменов).

Снимек НН30 в Еуропскому космичному агентству іе был назван «Снимком мѣсѧца» и іе достал признаніе както наі‐деталны снимек пробѣга родженіа звѣзд. Одднесі звѣздознавцы хте траіѫт (продолжѫт) изученіе сіеі обвласти Галактикы дабы разкрыти вече таін звѣздородженіа.