Чинскы термоіѧдровы (термонуклеарны) реактор працоваше вече неж 17 хвилин 20 сѣчніа 2025 года, и има сѧ надѣіа, же то іе не просто новым рекордом (1066 вторин, когда послѣдны рекорд имаше 403 вторины), але наі‐важным кроком к безграничному по мѣрѣ человѣчества запасу енергии, что приводи нас на уполно ины стѫпені развоіа цивилизаціи.

«Творно сълнце Чины» сѧ зова в Поднебесноі Експерименталны улѣпшены надпроводничны токамак (EAST) ‐ термоіѧдровы реактор, в кторому высокоенергетична плазма сѧ държи (не сѧ изпущаіе) в магнитноі пасти (замкѣ) мочными магнитными поліами. Але долго удържевати плазму донынѣ не быше имѣло успѣха, супротив тому, же над овым вопросом сѧ трудѧт іуж вече половины вѣка. В пробѣгу (процесу) термоіѧдроваго слиіаніа (синтезы) сѧ изкыда велікы броі енергіи ‐ исты пробѣг како вѫтрѣ Сълнца и иных звѣздах. Але в токамакѣ температура плазмы іе десѧт крат высше неж в іѧдру Сълнца, бо в глѫбости Сълнца термоіѧдрово слиіаніе сѧ почина хвала огромному натиску масы, коіего не имаме на Земли.

Досѧгненіе търваніа слиіаніа в 1000 вторин сѧ мыслѣше како кліучовы крок до властности над термоіѧдровоі енергіеі. И от, овы крок іе створен Изучилищом физикы плазмы Чинскоі академіи наук, ктор поставише и преішлы рекорд на истому реактору EAST в 2023 году.

Доколѣ всѣ сѧ труджаіут над неуросѣтіами, іе возможным, же наі‐главны предмет дліа бѫдѫчности человѣчества возникаіе точно здѣ, в области термоіѧдроваго слиіаніа.