Svět je byl snęt v mig razdvojenja: i volna, i čęstica sų v istomu snimku.

Švejcarski iziskateli stvorihu proryv, prvokratno zafiksirųči svět jednočasno kakto volnu i kakto čęsticu. Dvojna priroda světa je teoretično opisana Ejnštejnom, ale donyně nikto ne vidiše dva vida prirody jednočasno. Družina od Švejcarskago vysšago tehničnago izučilišča Lozanny (EPFL) je izrabotala metodu, ktora dozvoliše dostati značni rezultaty.

Svět obyknoveno javi sę ili kakto volna, ili kakto potok/struja čęstic, zavisno od uslovij ględanja. Naučnicy prez gody fiksirahu samo jedno od dvoh svojstv, i možnostj viditi obadva svojstva sę kazaše nedostižnoj. Novy eksperiment izměniše situacju. Iziskateli korystahu kombinacju lazera, nanoprovoda i struju elektronov za da fiksirujųt mig, kogda svět javi obadva svoja jestestva.

V proběgu eksperimenta lazerny lųč byše poslan na tončajšy metaličny provod. Lazer navedoše kolebanja vųtrě provodnika, prinudžajųči světovi volny běgati v soprotivnyh směrah. Pri naloženji sostrečnyh voln sę pojaviše stojača volna ‐ svět aki by okameněše v jednomu městu. Ova volna byše sredinojų iziskanij eksperimenta.

Daljej bliz provoda byše izpuščena struja elektronov, něktori elektrony proletajųči mimo volny sę ubystręhu, a něktori ‐ sę zamědljahu. Ovi izměny byše možnym poględati hvala svrhbystromu blizkoględu ‐ to byše podtvrdžanjem volnovoj prirody světa kakto stojača volna.

Ale takože eksperiment je dostal i iny fakt: něktori elektrony ne samo izměnjahu bystrostj, ale sę dotykahu do fotonov (čęstic světa) i sę razměnjahu s tymi kvanty energji. Ovy dokaz govori o čęsticovoj prirodě světa. V cělom, iziskateli zafiksirahu jednočasno javenja obědvoh prirod světa ‐ volnovoj i čęsticovoj v jednomu snimku.

Glava projekta Fabricjo Karbone kazaše, že to je prvo kogda kvantovu mehaniku «zafiksirali na snimku». Značenje odkrytja izhodi od smysla samo lěpago i ljubopytnago eksperimenta – možnostj ględati kvantovi proběgy na sjej nizkosti može posobiti tvorenju revolucijnyh tehnologij, napriklad kvantovyh izčisliteljej.