Saturn ima tęžinu 95 veče než Zemlja, ale několjko odstųpa od tęžiny Jupitera, ktor ima tęžinu 318 veče než Zemlja. Dolgo vremę vsě myslihu, čto je logičnym, že on ima mjenjš spųtnikov než Jupiter. Ale situacja sę směniše v 2020-h godah, kogda ulěpšenje dalnoględov daše odpověd na ovu problemu: Saturn ima veče spųtnikov.

Ješčo v 2017 godu šesta planeta našej sostavy imaše samo 50 lun (spųtnikov). Ale dnesj my zname o 274 lunah Saturna: to je dvakrat boljej než kupno imajųt vsě ostatni planety Slnečnoj sostavy. Zvězdznavcy, že stvorihu odkrytje myslęt, že ovo obilje je izslědkom katastrofičnago razrušenja. Musime kazati, že jednak v 1995 družina naučnikov vydaše rabotu, ktora predpovědiše skupinu spųtnikov Saturna s koloběgom istym kako imajųt dnešni odkryti spųtnicy, i ova predpovědj byše vydana bez hipotez o katastrofah.

V 2023 godu družina zvězdoznavcev provedoše dodatni izględanja hvala dalnoględu Canada France Hawaii i izjaviše razom 128 novyh spųtnikov. Na sjej sedmicě (11 breznja 2025 goda) Medžunarodny zvězdoznalny sojųz oficijno priznaše sji novi spųtnicy i dodaše im nomery v treh dokumentah (prvy, vtory, treti), a v bųdųčnosti oni hte dostųt imeny od skandinavskoj, galskoj ili inuitskoj mitologji. Večina spųtnikov donyně ne imajųt polnago opisanja koloběga. Je poznano, že večša čęstj je «skandinavskoj skupinoj», t.e. retrogradni spųtnicy. Mimohodom, ovi retrogradni spųtnicy, ih čislo (broj) u šestoj planety, dodajųt mnogu osobnostj situacji. Retrogradni sų luny, ktory sę obračajųt protivu obračenja samoj planety: oni ne mogųt byti stvoreny iz tvoriva planety, ale sų prijšlymi izvně i prisvojenymi planetoj‐gospodarom. Normalno, oni sų veljmi rědkymi, ale Saturn je stal izključenjem.

Spųtnicy byhu izjavjeni posrědstvom metoda «izměščenje i naloženje»: zvězdoznavcy stvorihu několjko snimkov jednago děla (čęstka) neba, naložihu ih jedin na drugy, i imahu vozmožnostj poznati blědi objekty. Vsě 128 spųtnikov sų «krivymi» – imųt ne kulnu (okrųglu) formu, ale podobnu do zěmjaka (kartofelja), bo ih prečnik ne prevysi několjkyh kilometrov.

Imaje predpoloženje, že ovi spųtniky sę pojavihu od odlomkov večšyh objektov, ktory byhu razrušeni od množestva udarov i potyček v poslědni 100 mln. godov. Tvorcy novoj naučnoj raboty sų opisali 64 od 128 novyh spųtnikov i dostali dany, že 54 od opisanyh 64 sų «skandinavami», t.e. retrogradnymi. Razměr i naklon ih je tako podoben, že naučnicy sų stvorili novu podskupinu «Mundiljfari» (od skandinavskoj mitologji), po imeni naj‐veljkago objekta podskupiny.

Oni sų predpoložili, že ova podobnostj parametrov podskupiny ne je slučajnym i desętky těl sę pojavili v poslědstvě jednago katastrofičnago natyka v poslědni 100 mln. lět nazad. Ale zagadka je v boljšemu prostoru medžu členami “Mundiljfari” (koloběžnomu fazovomu prostoru), než možno očakati poslě rezultata podobnago natyka (parametry podskupiny togda trěbajųt byti dnesj po‐podobnymi).

Takože Naked Science pisaše, že v 1995 godu krymski iziskateli Gorkavy i Tajdakov predpovědahu bytje retrogradnyh spųtnikov Saturna, ktory ne byhu odkrytymi togda. Predpovědj byše stvorena od izčislenij: těly, ktory doletųt do sostavy Saturna «protiv volny (sjersti)» (retrogradno), neizběžno bihu sę mědlili od soudarenja s čęsticami jegova okoloplanetnago diska, skoro utračajųči bystrostj i sę ostajųči v jegovoj sostavě.

Planety bez toljko močnago diska ne imųt ovago scenarja, bo asteroidy hte proletųt mimo planety bez sniženja bystrosti. V to vremę je bylo poznano samo 17 prostyh spųtnikov i jeden retrogradny, ktor sę mysliše kakto izključenje.

Faktom je, že poslě dnešnyh odkrytij, dostavšyh priznanje Medžunarodnago zvězdoznalnago sojųza, tvorcy članka 1995 goda predpovědihu blizko sta spųtnikov Saturna – to je naj‐veljka predpovědj v pověsti (historji) zvězdoznanje do dnesj. V 2001 godu Gorkavy i Tajdakov takože predpovědihu skupinu spųtnikov Neptuna na podlogě (zakladě) izčislenij: dnesj imajeme odkrytyh 5 spųtnikov. Čto bųde napredi?