Činsky termojędrovy (termonuklearny) reaktor pracovaše veče než 17 hvilin 20 sěčnja 2025 goda, i ima sę naděja, že to je ne prosto novym rekordom (1066 vtorin, kogda poslědny rekord imaše 403 vtoriny), ale naj‐važnym krokom k bezgraničnomu po měrě čelověčestva zapasu energii, čto privodi nas na upolno iny stųpenj razvoja civilizacji.

«Tvorno slnce Činy» sę zova v Podnebesnoj Eksperimentalny ulěpšeny nadprovodničny tokamak (EAST) ‐ termojędrovy reaktor, v ktoromu vysokoenergetična plazma sę drži (ne sę izpuščaje) v magnitnoj pasti (zamkě) močnymi magnitnymi poljami. Ale dolgo udrževati plazmu donyně ne byše imělo uspěha, suprotiv tomu, že nad ovym voprosom sę trudęt juž veče poloviny věka. V proběgu (procesu) termojędrovago slijanja (sintezy) sę izkyda veljky broj energji ‐ isty proběg kako vųtrě Slnca i inyh zvězdah. Ale v tokamakě temperatura plazmy je desęt krat vysše než v jędru Slnca, bo v glųbosti Slnca termojędrovo slijanje sę počina hvala ogromnomu natisku masy, kojego ne imame na Zemli.

Dosęgnenje trvanja slijanja v 1000 vtorin sę myslěše kako ključovy krok do vlastnosti nad termojędrovoj energjej. I ot, ovy krok je stvoren Izučiliščom fiziky plazmy Činskoj akademji nauk, ktor postaviše i prejšly rekord na istomu reaktoru EAST v 2023 godu.

Dokolě vsě sę trudžajut nad neurosětjami, je vozmožnym, že naj‐glavny predmet dlja bųdųčnosti čelověčestva voznikaje točno zdě, v oblasti termojędrovago slijanja.