16 sěčnja od startovago stola vo Floridě počęše svoj prvy izpytny polet raketa New Glenn, čto je dostala imę v počestj Džona Glenna – prvago amerikanskago kosmonavta, byvšago v koloběžnomu (orbitalnomu) poletu. New Glenn je raketoj kompanji Blue Origin, kojejų vlada Džef Bezos (Amazon).

Suprotiv hudago povětrja, raketa imaše uspěh na vozletu i poslaše na koloběg (orbitu) Zemli vtory stųpenj, čto je bylo cělju misji, ale prvy stųpenj byše utračen v čas sniženja. Blue Origin hoče povtoriti uspěh SpaceX – opuskati prvy stųpenj na vodnu platformu, aby poslě snova i opęt puskati ju v kosmos. Ne je divnym, že prvy krat ne je byl uspěšnym – koliko krat je trěbal Ilon Mask aby nakonec uspěšno opustiti raketu na hvostu ognja!

Ovy pusk rakety New Glenn specjalisty myslęt kakto veljmi važnym, bo dnesj SpaceX je dostal serjoznago konkurenta, a konkurencja privodi k sniženju cěny puska i vozdviženja bremeni na koloběg. Do dnešnago puska Blue Origin je byla poznana samo kakto organizator kosmičnago turizma, korystajųči malku suborbitalnu raketu New Shepard dlя svojyh smělyh klientov, ktora je ne dostj močna aby vozdvignuti bremę na koloběg.

New Glenn že ima vyšinu blizko 100 metrov i može vozdvignuti okolo 45 ton bremeni na koloběg (Falcon u SpaceX ima sposobnostj vozdvigati samo 22 tony). Ale nastųpna raketa Maska Starship ima naděju, že bųdi močna poslati až do 300 ton vsjaky krat – to i je konkurencja. Bezos takože ima veljki plany: on hoče sbudovati svoju posebnu koloběžnu stancju Orbital Reef, ktora bųde zaměnoj MKS. V dalnyh planah ili měčtah Bezos hte preměstiti promysl (industrju) vně Zemli v kosmos, pretvoręjųči planetu v jediny veljky park.

Blue Origin sę mysli kakto kompanja, ktora sę trudi medlo i usilno, jednak ne prijima kompromisov. Kompanja‐ta ima talisman, ktor dosylaje k basně «Žolva i Zajęc» s moralju: «Pospěh ‐ ljudjam na směh». Bezos kazaše v 2016 godu: «Myslime, že medlo znači gladko, a gladko znači skoro», stavęči sę antipodom SpaceX s jejnym sposobom prob i hybok dlja skorago dobytja nebes. Bųdeme čakati, kakov sposob hte sę javi naj‐efektivnym.

Dodnesj Mask i Bezos vsjaky krat žartovahu o kompanji supernika, ale nyně Mask prosto napisaše v X: «Dobrago pųti!».