Kogda bjology izučųt něku malku formu života, oni imųt ne samo abstraktnu korystnostj, izučenje pomagaje sę zabraniti od mora, tuberkuloza, malomočnosti. Protisty roda Plazmodium porodžųt zimnicu (malarju), ktora je umjertvila veče než 50 mlrd. čelověkov za vsju pověstj našego vida. Virusy takodže jesų groznymi, kako pamętajeme o koronavirusě.

V 2024 godu bjology neočakano izjavihu něčto mikroskopično, imajųčo genetičny kod vųtrě si, ale čto je to – ne je dostj razumlivym. Novi objekty (oni sų dostali imę obelisky) sų podobni do viroidov iz okrųžnoj RNK. Viroid – je takože zamknutoj okrųžnoj RNK (prostoj, ne dvoistoj cěpi), ktor ima mjenjš pol tysęči nukleotidov. Viroidy imųt odličnostj od virusov, bo virusy imųt ne mjenjš dvoh tysęčj nukleotidov, a takože posebnu bělkovu (proteinovu) povlaku, ktora uprosti pųtj prehoda od jednago organizma do inago (prez vozduh ili inako).

Obelisky sų odličnymi od viroidov, že možųt kodirati minimalno dva bělka (proteina) ili věrojętno daže veče dvoh. Oni imųt blizko tysęči nukleotidov (brojnostj je medžu viroidami i virusami). A takože okrųžna RNK v obeliskah je pokryta stolpopodobnoj vněšnej strukturoj, ktora i daše imę do sih patogenov.

Jest poznanym samo, že vně klětek vlastnika obelisky ne možųt sę množiti: genetičny kod ih je veljmi prostym, i ne je vidnym, že jestvujųt mehanizmy neparazitičnago množenja.

Mnogo trudnym je izpyt: da li to je život? Virusy i viroidy mnozi naučnicy ne myslęt kako život, bo oni ne možųt sę množiti vně inyh organizmov. Ale askarida takože ne može sę množiti samostojno, hotj je razumlivym, že to je život.

Korystnym je fakt, že 50% prob čelověčeskoj sliny od različnyh měst Zemli imųt obelisky, takože oni jestvujųt v 7% prob čelověčeskyh odhodah. Kakovu rolju oni imųt vųtrě čelověka, ne je izvěstnym. Možųt li oni navoditi bolezni, kako virusy v nas i viroidy v rastlinah? Ili obvratno, sų parazitami bakterij, ktory jestvujųt v našemu organizmu i tvoręt pomočj v kontrolě našej bezpěčnosti?

Trěba iměti vremę, aby poznati odvěty na sji izpyty. Dotogda ‐ fakt, že neočakano i veljko odkrytje byše v takomu poznanomu městu, kakto čelověčesky organizm. I nyně my imame cěly novy klas patogenov, jestvovanje ktoryh byše neizvěstno ješčo god nazad.