Od 1950 godov naučnicy korystajųt radjovolny dlja iziskanja nepoznanyh materjalov i inyh različnyh zadanij: od skaniranja čelověčeskago těla s MRT do izjavenja vybuhovyh tvoriv v letiščah.

Jednako, ovi metody sų zakladani na znakah, že posrednjajųt dany od mirjad atomov (nedělimov), čto ne može dati izjavenja malkyh izměn medžu osobnymi molekulami. Dnesj inženery Učilišča inženerji i prikladnyh nauk Pensilvanskago izučilišča (Penn Engineering) hvala kvantovym čujnikam (sensoram) sų stvorili revolucijnu izměnu ględanja spektra jędrovago kvadrupolnago rezonansa (JęKR) ‐ metodu, čto tradicijno sę korysti dlja izjvenja narkotikov i vybuhovyh tvoriv ili razbora lěkarstv.

Novy sposob, že byše opisan v časopisu Nano Letters, je tako vysoko točnym, že umožnuje izjaviti znacy JęKR od osobnyh atomov, že donyně sę liči nevozmožnym. Taka nevěrojętna čujnostj odkryva pųtj do dobytja novyh lěkarstv, gde razumenje molekularnyh vzajemodějstv na obsęgu (razměru) atoma ima glavno značenje.

«Ova metoda dozvoljaje nam izolirati osobni jędra i izjaviti malki različnosti molekul, ktory je byli mysleni kakto jednakovi», – kaže Li Baset, docent katedry elektrotehniky i sostavnoj inženerji (ESE), ręditelj laboratorji kvantovoj inženerji (QEL) Pensilvanji i glavny tvorec članka.

«Imajųči pozornostj samo na jednomu jędrě, my možeme odkryti podrobnosti molekularnago sostava i dinamiky (ruhstva), ktory byhu donyně skryti. Ova možnostj dopuskaje izučati budovni ųzly prirody Vsemjra vpolno v inomu obsęgu».