Свѣт іе был снѧт в миг раздвоіеніа: и волна, и чѧстица сѫ в истому снимку.

Швеіцарски изискатели створиху прорыв, първократно зафиксирѫчи свѣт іедночасно както волну и както чѧстицу. Двоіна природа свѣта іе теоретично описана Еінштеіном, але донынѣ никто не видише два вида природы іедночасно. Дружина од Швеіцарскаго высшаго техничнаго изучилища Лозанны (EPFL) іе изработала методу, ктора дозволише достати значни резултаты.

Свѣт обыкновено іави сѧ или както волна, или както поток/струіа чѧстиц, зависно од условиі глѧданіа. Научницы през годы фиксираху само іедно од двох своіств, и можності видити обадва своіства сѧ казаше недостижноі. Новы експеримент измѣнише ситуаціу. Изискатели корыстаху комбинаціу лазера, нанопровода и струіу електронов за да фиксируіѫт миг, когда свѣт іави обадва своіа іестества.

 В пробѣгу експеримента лазерны лѫч быше послан на тончаішы металичны провод. Лазер наведоше колебаніа вѫтрѣ проводника, принуджаіѫчи свѣтови волны бѣгати в сопротивных смѣрах. При наложеніи состречных волн сѧ поіавише стоіача волна ‐ свѣт аки бы окаменѣше в іедному мѣсту. Ова волна быше срединоіѫ изъисканиі експеримента.

Даліеі близ провода быше изпущена струіа електронов, нѣктори електроны пролетаіѫчи мимо волны сѧ убыстрѧху, а нѣктори ‐ сѧ замѣдліаху. Ови измѣны быше можным поглѧдати хвала свърхбыстрому близкоглѧду ‐ то быше подтвърджаніем волновоі природы свѣта както стоіача волна.

Але такоже експеримент іе достал и ины факт: нѣктори електроны не само измѣніаху быстрості, але сѧ дотыкаху до фотонов (чѧстиц свѣта) и сѧ размѣніаху с тыми кванты енергіи. Овы доказ говори о чѧстицовоі природѣ свѣта. В цѣлом, изискатели зафиксираху іедночасно іавеніа обѣдвох природ свѣта ‐ волновоі и чѧстицовоі в іедному снимку.

Глава проіекта Фабриціо Карбоне казаше, же то іе първо когда квантову механику «зафиксирали на снимку». Значеніе одкрытіа изходи од смысла само лѣпаго и ліубопытнаго експеримента – можності глѧдати квантови пробѣгы на сіеі низкости може пособити твореніу револуциіных технологиі, наприклад квантовых изчислителіеі.