Од 1950 годов научницы корыстаіѫт радіоволны дліа изисканіа непознаных матеріалов и иных различных заданиі: од сканираніа человѣческаго тѣла с МРТ до изъіавеніа выбуховых творив в летищах.

Іеднако, ови методы сѫ закладани на знаках, же посредніаіѫт даны од миріад атомов (недѣлимов), что не може дати изъіавеніа малкых измѣн меджу особными молекулами. Днесі инженеры Училища инженеріи и прикладных наук Пенсилванскаго изучилища (Penn Engineering) хвала квантовым чуіникам (сенсорам) сѫ створили револуциіну измѣну глѧданіа спектра іѧдроваго квадруполнаго резонанса (ІѧКР) ‐ методу, что традициіно сѧ корысти дліа изъівеніа наркотиков и выбуховых творив или разбора лѣкарств.

Новы способ, же быше описан в часопису Nano Letters, іе тако высоко точным, же уможнуіе изъіавити знацы ІѧКР од особных атомов, же донынѣ сѧ личи невозможным. Така невѣроіѧтна чуіності одкрыва пѫті до добытіа новых лѣкарств, где разуменіе молекуларных взаіемодѣіств на обсѧгу (размѣру) атома има главно значеніе.

«Ова метода дозволіаіе нам изолирати особни іѧдра и изъіавити малки различности молекул, кторы іе были мыслени както іеднакови», — каже Ли Басет, доцент катедры електротехникы и составноі инженеріи (ESE), рѧдителі лабораторіи квантовоі инженеріи (QEL) Пенсилваніи и главны творец чланка.

«Имаіѫчи позорності само на іедному іѧдрѣ, мы можеме одкрыти подробности молекуларнаго состава и динамикы (рухства), кторы быху донынѣ скрыти. Ова можності допускаіе изучати будовни ѫзлы природы Всеміра вполно в иному обсѧгу».