Сълнечны пробник (сонда) Parker (NASA) іе превысил успѣх (рекорд), максимално близко подлѣтив к Сълнцу на невѣроіѧтноі быстринѣ в 430000 милі/час. Оборѫдован новаторскыми технологіами, он іе прежил екстремалну температуру, абы собрати нови даны, кторы могѫт измѣнити разуменіе о сълнечных іавеніах и изъисканіа иных звѣзд.

24.12.2024 Parker Solar Probe, слѣдуіѫчи мисіи доткненіа Сълнца, поставише новы успѣх, максимално близко пролѣтише над повърхніеі го. Пробник быше над повърхніеі Сълнца само в 3,8 млн. милі и имаше быстрину — 430 тыс. милі/час: то значи, же пробник іе наі-быстрым устроіем од начѧла хисторіи, что іе был пущен человѣком. Знак (сигнал) од пробника 26.12.2024 подтвърдише, же кораб іе сѧ остал цѣлым и успѣшно прошел огніено изкѫшеніе си, и бѫде продължити своіу работу.

Такъв близкы полѣт к Сълнцу — то іе хисторичным моментом първоі мисіи человѣка к звѣздѣ, — казаше Ники Фокс, глава Управеніа научных мисиі NASA, — изучаіѫчи Сълнце близі, мы можем улѣпшити разуменіе си о вливѣ го на всіу сълнечну составу, такоже на технологіи, корыстани на Землѣ и в космосу, такоже о іествованіи звѣзд в цѣлому Всіеміру, что бѫде помочным нам в исканіу употрѣбных міров дліа нашего живота позад нашеі родноі планеты.

Абы достати Сълнца, космичны апарат, ктор быше изпущен в 2018 году, седем крат пролѣтише около Венеры, корыстаіѫчи іеіну гравитаціу. 6.11.2024 он утворише послѣдны пролѣт си Венеры и достигнуше оптималнаго обѣжнаго пѫти (орбиты). Обѣжен пѫті има овалну форму и всіаки три мѣсѧца изводи космичны апарат на идеалну удаленості од Сълнца, достаточно дліа изученіа загадочных процесов на звѣздѣ, дабы апарат не был пошкоден сълнечным теплом и свѣтлом. Космичны апарат бѫде остати на овому обѣжному пѫти до конца своіеі мисіи.

Parker Solar Probe твори иззов одноі из наі-екстремалных околиц (срѣд) в космосу и превосходи всѣкакви очѧканіа, — говори Нур Равафи, научны служебник проіекта Parker Solar Probe в лабораторіи примѣненоі физикы Джонса Хопкинса (APL), ктора быше проіектовала, будовала и нынѣ изкорыстуіе космичны апарат из кампуса си в Лореле (Мериленд), — ова мисіа одкрыва нову злату еру изъисканіа космоса, ставѧчи нас близко к разгаданіу наі-глѫбокых и наі-долгых таін Сълнца.

Близко к Сълнцу пробник корыстаіе щит од ѫглеродноі пены дліа защиты од екстремалнаго тепла в върху сълнечноі атмосферы (короны), ктора има теплину в 1 млн. градусов. Щит іе створен абы имѣти можності сѧ грѣти до 2600 градусов (выше неж сѧ топи сталі), позад ктораго устроіи имаіѫт комфортну покоіову теплину. В коронѣ, ктора іе веліми горѧчеі, але малогѫстоі, сѧ очѧкаіе, же щит бѫде сѧ грѣти до 1800 градусов.

Можності подводити космичны апарат тако близко до Сълнца — то іе велебно, — казаше Джон Вирцбургер, инженіер по составѣ мисіи Parker Solar Probe в APL, — ову заданіе человѣчство хтѣше рѣшити од 1958 года и изтратише десѧтилѣтіа абы то створити можным.

Творѧчи пролѣт в сълнечноі коронѣ, пробник може творити измѣры и изъіаснити, зачто овы регіон іе тако горѧчим, оглѧдѣти произход сълнечнаго вѣтра, и познати, како енергетичны чѧстицы достаіѫт быстрину си в половину од свѣтовоі быстрины.

Пробник такоже изъіавише одкрытіа во вѫтрешноі чѧсти сълнечноі составы. Изъисканіа показаху, же огромни сълнечни выбухы (выбухы короноваго творива), абсорбуіѫт пыл, движѫчи сѧ навън сълнечноі составы, такоже мы одкрыхме неочѧкано корыстни факты о енергетичных сълнечных чѧстицы. Пролѣты Венеры задокументоваху природно радіосвѣтло планеты од атмосферы, а такоже първы снимек обѣжнаго пыловаго поіаса Венеры.

Днесі космичны апарат само послаше вѣдомості, же он іе в безпѣчности, але скоро он бѫде в мѣсту, од ктораго бѫде можно послати даны, кторы быху собрани при послѣдному пролѣту вѫтрѣ сълнечноі короны. Настѫпни пролѣты іе заплановани 22.03.2025 и 19.06.2025.