Чѧсто мы сѧ препираме, кто іе умнѣі ‐ кот или пес. Але дості рѣдко сѧ препираме, кто іе разумнѣі ‐ томат или грах. И напраздно. Растлины имѫт своіствы, о кторых мы аж не домышліахѫ: мочності бесѣдовати, кривдати, крадати и жертвовати.

Растлины по днешному научному мнѣніу сѧ сообчаіѫт вѫтрѣ екосоставы корыстаіѫчи мицелиі ‐ грибну микоризну (грибокорѧну) мрежу. Дивным іе, же грибокорѧни мрежы даіѫт до 20-30% биомасы почвы (глины) (хоті традициіни методы изъіавеніа биомасы не могѫт то иззначити). Близко 83% растлин привидно имѫт обостранен свѧз с мицеліем както продълженіе своіеі корѧноі составы различноі велічины зависности: нѣктори оцѣны даіѫт информаціу, же грибокорѧни мрежы достаіѫт си вече неж 10% пълноі енергіи фотосинтеза растлин‐господаров.

Где сѫ приклады? Томаты! Томаты предаіѫт ин другому знак об огроженіу. Како іе сѧ изъіаснило, они то творѧт с помочіу грибнаго корѧна. Наприклад, когда іедна од растлин іе поражена шкодниками, она посыла в мицелиі химични знацы, ктори острегаіѫт околични кусты. Тако скупина томатов сѧ твори по-одпорна од хвороб и приживников/шкодников.

Чрез грибну мрежу такоже сѧ обчаіѫт нѣктори іедлы и брезы, кторы предаіѫт ин другому ѫглерод (карбон), такоже сѧ мѣніаіѫт душик (азот) и свѣтород (фосфор). Так, веліки древы помогаіѫт малым древечкам, кторы іествуіѫт в тѣни и не имѫт дості іѣдива.

През грибну мрежу растлины не само допомогаіѫт, але и крадѫт. Наприклад, нѣктори растлины не можѫт творити дості хлорофила дліа себѧ си, зато они сѫ наішли рѣшеніе ‐ крадати у другых. Тако твори орхидеіа Phantom, ктора одбира потрѣбни си творивы у древ околі.

Конкуренціа в природѣ іествуіе не само меджу животинами, але такоже меджу древами, мхами итд., то сѧ зова алелопатіа (взаіемостраданіе). Растлины воіуіѫт за свѣт и воду. Не имаіѫчи клов и пазоров, они творѧт битву химичными творивами, кторы изганіаіѫт конкурентов и недобрых сосѣдов. Наприклад, акаціа и еукалипт іесѫ истинно адскыми сосѣдами: они изнищаіѫт растлины околі, сменішаіѫчи броі корыстных микроорганизмов в корѧнах сосѣдов.

Такоже растлины могѫт иззначати категоріу: «своі»/«чуджы». Млади древы всегды ищѫт заіѧти вече мѣста при изращеніи корѧнов си: тако они можѫт достати вече воды и свѣта. Самозрѣіно, веліки древы околі не имѫт желаніа оддавати ресурсы всѣм младичам – починаіе сѧ конкуренціа. Але конкуренціи не имаіе сѧ, ако околі растѫт само «братіа» од іеднаго матерскаго древа – тогда обвратно, они сѧ силѧт, же бы всѣм «сродникам» сѧ достало мѣсто и ресурсы.

Обычаіно, лѣс ‐ то іе скупина различных растлин с самостоіными корѧными составами. Але іествуіѫт лѣсы, наприклад Пандо (Трепетаіѫчи Велікан), кторы имѫт іедину корѧну составу. Ови лѣсы сѧ зовѫт клоналными колоніами (такоже, генетичны особник, или генет). В Пандо всіако древо (осина, тополі) іе както вѣтеві іединаго огромнаго организма и сѧ зова рамет, а обча тѧжина лѣса Пандо іе 6000 тон. Научницы мыслѧт, же овы лѣс има іуж вече 80000 лѣт и іе практично наі‐велікым организмом планеты.