Атмосфера іе областіу около Земли, где плын сѧ врачаіе с планетоі както іедино цѣло. Атмосфера преходи в меджупланетны простор постѫпно, в екзосферѣ на вышинѣ 500-1000 км од повърхни Земли.

Согласно меджународному иззначеніу, граница атмосферы проходи по линіи Кармана (100 км), выше ктороі самолеты не могѫт летати. НАСА корыста ину границу, (400 000 футов), где шаттлы прекліучаху корыстане силников при маневрах на корыстане кридл за планиране (полет).

Атмосфера Земли има настѫпни чѧсти:

Планетарны пограничны слоі: 1-2 км од повърхни, своіствы и кондиціа прѣмо зависи од реліефа.

Тропосфера: първы слоі атмосферы (до 10 км в приполаріи, до 12 км в средных ширинах, до 16 км в тропичных/екваториалных ширинах), зимоі слоі іе по-низкым, неж лѣтом. Овы слоі содържи до 80% масы воздуха и до 90% масы воднаго пара. Вечина облаков, циклоны, антициклоны сѧ поіавліаіѫт в тропосферѣ. Характеристикоі тропосферы іе сниженіе температуры с ростом высоты.

Тропопауза: області атмосферы, где сниженіе температуры с ростом высоты престаіе.

Стратосфера: Вторы слоі атмосферы Земли (до 50 км), има два подслоіа: нижны (до 25 км), где температура мало расте, и върхны (до 50 км), где температура вырастаіе до 273К. В овому слоіу сѧ размѣщаіе озоновы слоі, ктор обраніаіе планету од ултрафіолетоваго свѣтла.

Стратопауза: області атмосферы до 55 км, где температура храни теплості около 273К.

Мезосфера: Трети слоі нашеі атмосферы (до 100 км), граница зависи од сезона и землеписноі ширины, температура снову сѧ понижаіе с ростом высоты. Главна характеристика области – лучны пренос тепла. Такоже фотохимични процесы, кторы пораджаіѫт свободни радикалы, возбуджени молекулы итд. пораджаіѫт свѣченіе атмосферы.

Мезопауза: Преходна області с минимумом температуры в -90 градусов Целсіа (183К).

Линіа Кармана: Условна граница космоса и атмосферы.

Термосфера: Четвърты слоі атмосферы Земли (до 800 км). Температура сѧ повышаіе до 1500К (до 200-300 км), а послѣ остана сталоіѫ до конца слоіа. Под Сълнечноіѫ радіаціеі и космичным свѣтлом сѧ твори іонизаціа воздуха (поларно сіаніе). Върхна граница слоіа зависи од днешноі активности Сълнца, в периоды Сълнечнаго максимума термосфера сѧ шири, в периоды минимума – сѧ низи.

Іоносфера: області атмосферы, где іествуіѫт свободни іоны. Како казано выше, ова області лежи в върхнеі мезосферѣ, мезопаузѣ и термосферѣ. Противу іоносферѣ говорѧт о неутросферѣ, где свободных іонов не имаіе: то іе нижнеіѫ чѧстіу атмосферы од тропосферы до мезосферы.

Термопауза: області атмосферы, где сѧ прекрачаіе поглъщеніе (абсорбиране) Сълнечнаго свѣтла и температура не сѧ мѣни односно высоты.

Екзосфера: Послѣдны, пѧты слоі атмосферы Земли (од 1000 км), зона разсѣиваніа. Плын в екзосферѣ іуж іе тако разрѣжен, же чѧстицы утѣкаіѫт в меджупланетны простор (диссипаціа).

На вышинѣ 2000-3500 км екзосфера преходи в ближнекосмичны вакуум, ктор има рѣдки чѧстицы меджупланетнаго плына и матеріи (кометнаго и метеорнаго породженіа), а такодже Сълнечна и Галактична радіаціа.

Днешна наука мысли, же наі-върхна чѧсті екзосферы Земли (геокорона) достига 100 радіусов Земли (640 000 км), что іе близко в 1.5-2 кратно даліеі неж простор од Земли до Луны.