Полвѣка в космосу: знамениты космичны апарат Воіаджер-1 утрачаіе остатну енергіу

Научницы сѫ наново оправили працовитості (функціоналну способності) космичнаго апарата Воіаджер‐1 послѣ рѧдовоі хыбкы. Іест вѣроіѧтным, же іегов пѫті длиноі в 47 лѣт сѧ близи до конца си. Сѧ очакаіе, же устроі не хте преживе 2025 год.

В руініу (октобру) 2024 года Воіаджер‐1 снову досташе похыбку: послѣ достаніа команды «вкліучити грѣіницы» (радіаторы), тоі престаше присылати информаціу. Але дружинѣ инженеров сѧ удаше вкліучити резервны состав свѧза.

Како іе сѧ поіавил Воіаджер‐1?

В 60-х года научницы вызнаху, же к концу 70-х годов планеты Сълнечноі составы бѫдѫт рѧдом на іедноі линіи, и их гравитаціа може быти корыстана дліа ускореніа космичных апаратов, бо нажалі быстрості, же могѫт дати устроіу ракетовы силницы, не іест достаточным дліа изученіа Сълнечноі составы.

Неможно быше утрачати таку удобну можності, зато НАСА взѧху апараты Маринер и скоректираху их к новому заданіу. Они личаху, же Воіаджеры пропрацуіѫт само нѣколіко лѣт, изучаіѫчи іедино Іупитер и Сатурн. Никто не мыслише, же бы пролѣтети мимо Урана и Нептуна.

Что іе открыл Воіаджер-1?

Изученіе планет бѣше согласно плану, але наі‐корыстна информаціа быше достана послѣ. До старта Воіаджеров никто точно не зна, что іест в меджузвѣздному простору: іествоваху домыслы, але точна информаціа не.

Първа удалості быше в 2004 году, когда Воіаджер-1 на далности 94 а.е. преидеше границу ударноі (разовоі) вълны Сълнечнаго вѣтра (поток ионизованых чѧстиц, кторых ліуди чуіѫт както магнитны бури, и кторы породжаіѫт сѣверно сіаніе), зад ктороі Сълнечны вѣтр іествуіе както прѫжны газ – сѧ стискаіе и разгрѣваіе.

В 2011 году Воіаджер-1 достигнуше зоны, где Сълнечны вѣтр завиіаіе под натиском меджузвѣзднаго околища и одкрыше ултра-фіолетово свѣтло Млечнаго Пѫти.

В 2012 году напърво начѧху говорити о изходу из геліосферы в меджузвѣздны простор, где поток чѧстиц од иных звѣзд іе выше неж поток чѧстиц од Сълнца. Але никто точно знаше, где сѧ кончи геліосфера, и каково повинно быти магнитно поліе внѣ тоі. Научницы подтвърдиху изход апарата из геліосферы само в 2018 году.

Меджу тым, изход из геліосферы не іе изходом внѣ Сълнечноі составы, ктора об’іединіаіе вси об’іекты, же сѧ обрачаіѫт около Сълнца: астероиды, малы планеты, кометы. Где іе точно граница Сълнечноі составы не іест познаным, але може то ограничаіе облак Оорта – скупище об’іектов на наі‐далних орбитах. Теоретично, Воіаджеры хте достигѫт облака Оорта чрез 30 тысѧч лѣт.

Колико бѫде жити Воіаджер-1?

Днесі апарат сѧ оддаліаіе од Сълнца с быстростіу 17 км/с, а далності од Сълнца іе іуж 24,8 млрд. км: свѣт проходи то разстоіаніе за 22 ч. 59 мин.

Устрои сѫті веліми издържливы, — само іедна функціа быше одкліучена с поводу деградаціи, а не економіи енергіи, — але нынѣ працуіѫт само 4 функціи од 10, и скоро те такоже бѫдѫт одкліучены. Причина іест в іѧдерных батареіах, працуіѫчих на разпаду плутоніа, ктор од началноі мочности в 470 ватт, в 2012 году стратише 45%, а в 2025 году не добѫдет енергіи дліа грѣіаніа и функціонираніа.

Чрез 40 тысѧч лѣт Воіаджеры хте приблизат к звѣздѣ Глизе 445 созвѣздіа Жирафы, пролѣтаіѫчи мимо тоі на далности 15 трлн. км., але нажалі ниіакоі информаціи они іуж не хте пошліут до Земли.