Океан — іе наі‐велікоіѫ чѧстію всіемирнаго воднаго простора, ктори сѫті раздѣлени континентами. Океаны сѫті различными не само положеніем, але такоже водными характеристиками (теплостію, сланостію, гѫстостію), океаничными токами и структуроі дна.

Днесі вычленуіѫт 5 океанов на Земліе: Тихы, Атлантичны, Сѣверно-Ледовы, Индиіскы и Іужны.

Тихы океан іе наі‐глѫбокым, наі‐велікым и наі‐богатым животными организмами. Своіе имѧ он полѫчи в 1520 году, гда Фернан Магелан преходѣше од Огніеноі Земли до Филипинскых островов и не стрѣтише ни іедноі бури. Повърхності Тихаго океана іе близ 165,25 млн. кв. км., что іест около половины повърхни нашоі планеты. Максимална глѫбина іе вече 11 тыс. м. в Марианскому жлѣбу, что сѧ зова Бездна (Глѫбочина) Челенджера. Температура воды сѧ мѣни зависно од географичноі ширины и поры (сезона): в тропиках (в тропичному пасу) достига +30 °C, а в поларных ширинах — -2 °C.

Атлантичны океан іе вторым послѣ Тихаго океана односно велічины, и такоже тоі іе наі‐сланым. Повърхності Атлантичнаго океана іе близ 82 млн. кв. км., наі‐глѫбокым мѣстом іе жлѣб Пуерто-Рико (близ 8742 м). Особливості сего океана іе реліеф: огромен Средоатлантичны хръбіет бѣжи од сѣвера до іуга чрез цѣл океан. Океан тоі досташе имѧ в 5 столѣтіу од Геродота в почесті титана Атланта из дрѣвногречскых миѳов, ктор държаше небо на рамену си. Температура воды такоже може сѧ выси до +30 °C и сѧ низи до -2 °C односно земліеписноі ширины и сезона.

Индиіскы океан іе третіим океаном на Земліе односно велічины. Повърхності океана іе близ 70 млн. кв. км., наі-глѫбоко мѣсто іе в Зондскому жлѣбу, имаіѫчи 7258 м.. Имѧ океан тоі досташе в 16 столѣтіу, але Плиниі Старшы іуж в 1 столѣтіу по Р.Х. именоваше іего «Океанус Индикус» (Индиіскы). Индиіскы океан има остров Мадагаскар с веліми посебноіѫ фауноі. Тоі океан іе наі‐теплым, але фактично температура такоже сѧ колыше од -2°C до +30°C односно ширины и сезона.

Сѣверно-Ледовы океан іе наі‐малым на планетіе, але по колікости островов іе на второму мѣсту послѣ Тихаго. Повърхності океана іе близ 15 млн. кв. км., наі‐глѫбоко мѣсто іе в Грендландскому моріу и има 5527 м.. Сѣверно-Ледовы океан іествуіе само в сѣверноі полкуліе (полсферіе). Първо како самосебны океан тоі быше оддѣлен земліемѣром Бернхардом Вареніусом в 1650 году, сѧ именуіѫчи Гипербореіскы океан. В 19 столѣтіу първо океан досташе имѧ Сѣверно‐Ледовы, и тако сѧ именуіе нынѣ. Океан има наі-низку средну температуру, сѧ мѣнуіѫчи од -1,8°C до +5°C. Такоже вечина повърхни іе покрыта ледом, что такоже іе дало чѧсті имени.

Іужны океан іе наі‐новым в земліеписноі наукіе, практично признаным само в 21 столѣтіу, але донынѣ тоі не има точных границ. Интерпретаціа, же іе приіѧтоі в 2000 году, има границы Іужнаго океана както ниже 60-і равнобѣжкы (паралели) іужноі ширины. Тогда повърхності Іужнаго океана іе близ 20,327 млн. кв. км. и има наі‐глѫбоко мѣсто в Іужно-Сандвичевому жлѣбу с 8264 м. Але како и Сѣверно‐Ледовы, Іужны океан іе правдивым феноменом, бо има своі ток, своіу екосистему и други характеристикы, ктори вызначаіѫт овы океан како посебны.